Parau tuatapaparaa i te tapura faanavai raa faufaa no te matahiti 2009.
Te peretiteni o te apooraa rahi
Te peretiteni o te hau fenua
Te mau faatere hau
Tatou te mau mero o te apooraa rahi
Te mau papai vea, tatou paatoa Ia ora na i to tatou farereiraa i teie mahana
Te tuu mai nei outou i mua i te mau mero o te apooraa rahi i te hoe parau tuatapaparaa i te tapura faanavai raa faufaa no teie matahiti 2009.
Ua taio maitai vau i ta outou mau tatararaa i nià i te parau no te faahoturaa i to tatou fenua, e te tiàturi nei au e, ua papai mai outou i teie tapura faanavai raa faufaa ia au i ta outou mau opuaraa.
I roto i ta outou hioraa, te parau faufaa roa, oia hoi te parau no te faahotu raa i te fenua e te parau no te ohipa.
I roto i te mau raveà ta outou i tapea mai ua tape anoa mai au e piti.
Oia hoi :
- Te haatoparaa i te parau no te hoo
- E Te mau ito api
Tera ra, i roto i te tapura faanavai raa faufaa e ere roa tu ia te reira.
Te hinaaro nei outou e faahoi i te moni e vai nei i roto i te afata FRPH e te afata CAVC i roto i te tapura faufaa o te fenua. I nià ia i te hoe faito hoe miria e toru hanere mirioni.
E faatitiaifaro mai outou mai te peu te hape nei au.
Te faufaa e vai nei i roto i te afata FRPH, e faufaa ia no roto mai i te hau fenua, o te moni ia a te nunaa.
Teie pai afata, ua faataa hia teie faufaa moni mai te peu e, e maraa te moni hoo o te tura mori.
I teie mahana, aita e tià ia outou ia haapapu mai e, aita te moni hoo o te tura mori e maraa ananahi.
Tera ra, no te mea hoi e, ua farerei outou i te tahi mau fifi i nia i te parau no teie tapura faanavai raa faufaa, manao atura outou e rave ohie noa.
E tii i roto i te mau afata e faufaa to roto no te tuu atu i roto i te tapura faufaa o te fenua.
I taù hioraa, mea tià ae e vaiho I teie tuhaa moni I roto I te afata FRPH, ia ore pai tatou e hiti mahuta mai te peu e, e maraa faahou mai te moni hoo o te tura mori
Aore ra, mai ta outou pai e faahiti nei i roto i ta outou parau tuatapaparaa, tuu tei faufaa moni i nia i te mau opuaraa no te Ito api.
Aore ra, faatopa te parau no te moni o te litera mori i roto i te mau fare hoo raa mori, mama ai te oraraa o to tatou huiraatira.
Tera, te faaohipa ra ia outou i ta outou i papai.
No te mea hoi e, te ite nei au e, aita roa atu te parau ta outou i papai e tuàti ra i te parau ta outou e hinaaro nei e rave na roto i teie tapura faanavai raa faufaa
No te mea hoi e, te hinaaro nei matou e paruru i to tatou nunaa e auta ra i roto i to ratou oraraa I tem au mahana atoà
E patoi matou I teie tapura faanavai raa faufaa.
Mauruuru i to outou faaroo raa mai e Ia ora na.