Nos représentants ont examiné la proposition de résolution sur la réhabilitation de Pouvanaa a OOPA

Intervention de Madame Emma MARAEA

(Séance du 7 juillet 2009)

Rapport N°121-2008 relatif à une proposition de résolution tendant à obtenir la réhabilitation de Pouvanaa a OOPA

Te Peretiteni o te apo’oraa rahi,

Te hui to’ofa

Te peretiteni o te hau fenua, te mono peretiteni, e te mau fa’aterehau,

Tatou te mau mero o te apo’oraa rahi,

Te mau papa’i vea,

Te utuafare Oopa,

Tatou pa’atoa, fa’ari’i mai i to matou tapa’o aroha i to tatou farereira’a i teie mahana api,

 Te parau mau e te parau ti’a. E parau rahi e te fa’ahiahia ato’a.

Ua ite pa’ato’a tatou e, e ere ia i te mea ohie i te fa’ariira’a i te parau mau no te mea i te tahi mau taime mea mauiui ia fa’arii i te reira.

I roto i te aai o te oraraa poritita, ua tamata te tahi pae i te ape’e atu i te mau arata’ira’a poritita a Pouvanaa a Oopa. Ua ma’iri e 50 matahiti i teie mahana, e ti’a roa ia ia tatou ia fa’ahanahana hi’a te arora’a a a teie Metua, no na anei, no tana hua’ai tamari’i anei i teie mahana, e no tatou te nuna’a no Porinetia farani.

No te fa’ahanahara’a i te Metua ra o Pouvanaa a Oopa mea tano na mua roa ia hi’o rii mai tatou i tona orara’a.

O vai o Pouvanaa a Oopa ?

E tamari’i teie no te motu no Huahine i Raromata’i o te fanau hia i te matahiti 1895 e o tei pa’ari i roto i te oraraa  faaroo.

I te omuara’a o te matahiti 1940 ua ha’amau mai ona i tana pupu poritita, e ua amo mai i te ti’araa mono peretiteni o te hau fenua e te ti’araa tepute i te matahiti 1949.

 Teie metua, e taata ia tei here hia e te nunaa, e tei fa’atura ato’a hia.

I te 11 no atopa no te matahiti 1958 fa’autu’a hia ai oia i te utu’a fare auri no te maorora’a 15 matahiti, fa’areva roa hia ai oia i te fenua farani.

I te matahiti 1968, ua matara mai teie metua e i te matahiti 1971, ua riro mai oia e hui toofa e tae atu i te matahiti 1977, fa’arue mai ai oia i teie nei ao.

********

E tano i teie mahana i te parau i tona parau ma te ore e huna i te mana’o.

Eaha te ti’araa mau o teie metua i roto i te orara’a poritita ?

E parau ia te tahi pae e, o Pouvanaa a Oopa, o te metua ia no te TIAMARAA, e e parau te tahi pae e, o Pouvanaa a Oopa o te metua ia o te IHOFAATERERA’A (autonomie).

Mea faufa’a anei i teie mahana i te parau ra’a e o te TIAMARAA aore ra o te IHOFAATERERAA tana arata’iraa poritita ?

Eita roa tu. Te ohipa faufa’a roa, ia fa’arii te hau farani, te ture farani, tatou te mau mero o te apo’ora’a rahi, i te aai no teie metua o tei aro mai no tona fenua e no tona nunaa, e tae roa atu ai oia i roto i te fare auri.

A hio na ra tatou i te huru taviniraa mau ta teie metua i rave mai no tona nunaa. Noa tu te mau fifi tei amo hia e ana, aita o’na i faarue ae i tana arora’a e tae roa atu ai i te taime i pohe ai oia.

Tera te ohipa faufa’a ta tatou e tapea mai. Tana aroraa tu’utu’u ore i nia i te mana’o hohonu o tana i ti’aturi e, e mea maita’i no te nunaa.

***********

I teie mahana, ua fa’arii te hau farani e amo i tana tuha’a i ni’a i te parau no te mau tamatamatara’a atomi. Aita te ta’ato’ara’a o te aniraa a te mau feia rave ohipa no Moururoa i manuia roa, tera ra ua ite hia te hoe nuuraa papu.

E ere roa tu teie manao e, no te faahaparaa aore ra no te paruru raa i te hau farani. Mea tano ra ia tatou ia faari’i e, i roto i te tau i parahi mai ai te nu’u farani i to tatou fenua, te vai nei te tahi mau maita’i ta tatou i faari’i mai e te vai ato’a te tahi mau tuha’a i ore i tano i roto i te arata’ira’a a te hau farani.

Teie a’amu, e a’amu ia ta te hau farani e hina’aroo nei i te amo, e no reira ua ani te peretiteni o te hau repupirita, ia faarii te hau metua i tana mau hape e ia fa’ahanahana hia te a’amu o te metua ra o Pouvanaa a Oopa.

E tia ato’a ia tatou ia amo i ta tatou tuhaa.

I te tau i fa’autu’a hia ai o Pouvanaa a Oopa, ua ora mai to tatou fenua i roto i te ho’e tau fifi roa i ni’a anei i te orara’a poritita, i te pae atoa ra o te fa’ahotu raa i te fenua.

Ua parau atoa hia te parau no te fa’atutera’a, te fa’ahotu ra’a i te pae o te fa’ariira’a ratere, te tautai, te fifi o te vanira.

Ua tuatapapa atoa hia te parau no te papa ture, ma te ore e tuatapapa papu hia, no te mea aita te mau ti’a poritita no tera ra tau i papu roa i nia i to ratou mau hinaaro.

I tera ra tau, ha’amana’o mai na tatou i te mau arora’a poritita tei tupu. Ua vai noa te nuna’a i roto i mauruuru ore e te painu hoi i mua i tona ananahi.

Rave rahi mau i’oa, mai ia Jean Baptiste CERAN JERUSALEMY, o Rudy BAMBRIDGE e te vai atura o tei amo mai te mau ti’araa faatere.

Ua ite ato’a hia te tahi mau fa’aterera’a o te fa’ata’ahuri hia.

E au pa’i e, ia fa’aau anae vau, e ere roa atu i te mea atea roa i teie mahana.

********

Te ite nei tatou, e mea na roto ia i teie mau arepurepura’a, i faatumu roa ai te hau farani i tana mau ture i to tatou nei fenua, i topa ai o Pouvanaa a Oopa i mua i te faautu’araa.

I teie mahana, te hinaaroo nei te hau farani, ia fa’ahoi hia o Pouvanaa a Oopa i ni’a i tona ti’araa mau ma te fa’arii e, e taata parau rahi teie e o tei aro noa no te maita’i o tona nunaa na roto i te tavini papura’a ia na.

Mai ta teie metua i parau i te taime i tu’u hia ai oia i rapae au i te fare auri : Aita to’u ma’ino’inora’a. Te hau farani e nunaa rahi teie e o ta’u e ti’aturi nei.

Mea na roto i te haehaa tona faarii raa i tona aamu. E ti’a atoa ia tatou I teie mahana ia arata’i tatou I to tatou mau manao, ta tatou mau parau e ta tatou mau faaotiraa ia au I te huru o teie metua.

Tamata na tatou i te rave amuiraa i te hoe fa’aotira’a ma te tuu atu I to tatou mau inoino I te hiti, ia manuia tei aniraa e hiofaahou i te parau no te Metua o Pouvanaa a Oopa.

Eiaha to tatou reo ia vai noa i roto i te apo’oraa rahi. Ia fa’atae roa hia ra to tatou reo i te fenua farani, e te ti’aturi nei tatou e, na to tatou mau iriti ture e to tatou mau hui to’ofa e rave mai i teie tuhaa.

Ia riro outou e mau vea tonohia e te nunaa no te afa’i raa atu teie aniraa, mai ta Pouvanaa a Oopa i rave ato’a i tona ra tau.

Te mau taeae, te mau tuahine, te fetii tamarii a Pouvanaa a Oopa, fa’arii mai i teie mana’o turu a te pupu TO TATOU AIA i nia i teie opuara’a.

Ia parau hia te parau mau e te parau ti’a e ia ite hia mai te ohipa faufaa ta teie metua i vaiho mai no tatou i teie mahana.

Ia riro teie tumu parau e faatahoe ia tatou, na roto i te haehaa e te aau maehara.